法治吃人已經不是新聞，國法之下的裁決，除了失語和爆粗之外，想不到第三個反應。倒是想起幾年前曾經記下和豬仔的一段床邊對話。
話說有一晚跟豬仔講希臘神話，故事講到宙斯親生父親怕子女搶奪自己的王位，所以一口氣吞晒所有仔女落肚。
豬仔當場O嘴：「吓！食BB？咁YUCK！？」
豬媽心腸歹毒，立刻食住上：「嗯⋯⋯係囉，咁如果比你揀，你會食人定食屎呢？」
要知道臭豬平日是這樣孝敬母親的：
「媽仔，你今日有無放臭屁呀？」
「媽仔，你不如試下將隻腳趾塞入鼻哥……」
「媽仔，一定要你揀，你會去冰川凍死定沙漠熱死呢？」
為母不是省油的燈，看準今次是報仇機會，你敬我一尺我敬你一丈，拋個處境問題睇佢揀食屎定食BB？
出乎意料之外，已經變成ABC的臭豬，諗都唔諗就用流利廣東話回答：「梗係食屎啦！」
豬媽有點感動又有點慚愧，換著我一定兜佢遊花園然後兩樣都唔揀。自知小人之心，即刻收起魔鬼尾巴戴返個天使頭盔，雙眼亮晶晶咁話：「媽媽真係好欣賞你的選擇。你啱呀，我哋食屎都唔可以食人呀！」
為母知道人性軟弱，一念天堂一念地獄，初心好易被人性活埋、被挫敗消耗。為咗灌溉阿仔食屎呢粒種子，過兩日我又好浮跨咁天使上身喇。
「豬豬呀，媽媽真係好拋of you，你記得自己無論如何都係揀食屎呵？寧願食屎都唔好害人呀⋯⋯最多⋯⋯我⋯⋯陪你食啦。」（不知那裡來的勇氣⋯⋯為母則強是認真的）
臭豬秒速沾沾自喜，然後一派認真咁話：「媽仔，我有辦法！」
吓？咁環境仲有咩屎橋呢？
「我地食屎之前可以用多啦A夢嘅法寶，將自己變成一隻狗先⋯⋯因為Snowball（家中愛犬）都好鍾意食屎，我地變咗狗就唔怕臭。」
童言無忌，做人做到狗咁仲要食屎不怕臭總好過吃人，雖然哭笑不得但為母心中有暖流。不知道今天再問同一個問題，豬仔會如何選答。從不期望孩子做偉人義士，活過一定歲月，對於是非黑白，已經不敢貿然在道德高地說三道四，有時我們自以為可以善良到底出淤泥而不染，其實不過是沒有在濁水混過才能明哲保身。
自由無價，冤獄比做狗吃屎更難捱，所以有人變節有人退縮至少沒有吃人；只是比較之下，那些堅守到底的人更顯得高貴。在最壞的時候，如果我們還關心還在乎那些在牆內受壓的人，最大的打氣就是收回那隨口一句的「香港已死、香港無得救」。人人都看見由治入興的誇啦啦了，只是心照不宣。信念從來不是權衡利弊之後的選擇，而是知其不可為而為之。當堅守信念的人為了更多人的自由而被奪去自由，一句判死的說話就如𡁻完鬆的風涼話，說者無意，聽者心都涼了一截。
做媽的有時胡思亂想也會心中上演小劇場，如果孩子的良知有一天動搖了，那我可以怎麼辦？孩子大了，為人父母也不好意思多嘴説教，每個人都終要為自己的所作所為承擔後果。無論是好是壞是對是錯，如果孩子不嫌棄，我仍然會緊緊抱他一把，希望我們會記得曾經約定一起去吃屎。毋忘初心就好！
所以我知道為了女兒，幸彤媽媽的心比誰都強大，牆內牆外的人都要保重！讓吃人的無地自容。
讀畢，呢段特別有同感：「活過一定歲月，對於是非黑白，已經不敢貿然在道德高地說三道四，有時我們自以為可以善良到底出淤泥而不染，其實不過是沒有在濁水混過才能明哲保身。」
畢竟逼到埋身，先知道自己會有咩反應。唔期待普通人如自己有咩大作為；如果可以避免突破底線，不理想但尚可。